கதாநாயகியாக அறிமுகமாகும் வனிதா விஜயகுமாரின் மகள்

சென்னை,

நடிகர் விஜயகுமாரின் மகளான வனிதா விஜயகுமார் கடந்த 1995-ம் ஆண்டு வெளியான ‘சந்திரலேகா’ திரைப்படத்தின் மூலம் திரைத்துறையில் அறிமுகமானவர். அதைத்தொடர்ந்து ‘தேவி, நான் ராஜாவாகப் போகிறேன், அநீதி’ என பல படங்களில் நடித்துள்ளார். இவர் தற்போது தனது மகள் ஜோவிகா விஜயகுமார் தயாரித்துள்ள ‘மிஸ்ஸஸ் & மிஸ்டர்’ என்ற படத்தில் நடித்துள்ளார்.

இந்த படத்தை வனிதா விஜயகுமார் அவரே இயக்கி நடித்துள்ளது குறிப்பிடத்தக்கது. இந்த படத்தில் ராபர்ட் மாஸ்டர் முக்கிய கதாபாத்திரத்தில் நடித்துள்ளார். இப்படம் ஜூன் மாதம் வெளியாக உள்ள நிலையில், இப்படத்தின் இசை வெளியீடு விழா நேற்று சென்னையில் நடைபெற்றது.

அந்த விழாவில் நடிகை அம்பிகா, பாத்திமா பாபு, இயக்குனர் வசந்தபாலன் மற்றும் படக்குழுவினர் கலந்து கொண்டனர். விழாவில் வனிதா விஜயகுமார் பேசுகையில், “இந்தப் படத்தின் மூலம் என் மகள் ஜோவிகா தயாரிப்பாளராக அறிமுகமாகி இருக்கிறார். மேலும் அவரைப் பற்றி இன்னொரு மகிழ்ச்சியான செய்தியை அறிவிக்க இருக்கிறேன். தெலுங்கு திரை உலகில் 2 படங்களில் கதாநாயகியாக நடிக்க இருக்கிறார்.

அதற்கான ஒப்பந்தங்கள் கையெழுத்து ஆகிவிட்டது. ஜூன் மாதம் முதல் படப்பிடிப்பு தொடங்க இருக்கிறது. தெலுங்கு திரை உலகில் பல ஹிட் படங்களை கொடுத்த சுமந்தா புரொடக் ஷன்ஸ் படத்தை தயாரித்து இருக்கிறது. எம்.எஸ்.ராஜு படத்தை இயக்க உள்ளார். படத்தில் அழகான பவர்புல் கேரக்டரில் ஜோவிகா நடிக்க இருக்கிறார் என்பதை மகிழ்ச்சியோடு தெரிவித்துக் கொள்கிறேன்.” இவ்வாறு அவர் கூறினார்.