‘வாடிவாசல்’ படத்தின் அப்டேட் கொடுத்த தயாரிப்பாளர் தாணு

சென்னை,

தனுஷ் நடிப்பில் 2007-ம் ஆண்டு வெளியான பொல்லாதவன் படத்தின் மூலம் தமிழ் திரையுலகிற்கு இயக்குநராக அறிமுகமானவர் வெற்றிமாறன். அதன் பின்னர் ஆடுகளம், விசாரணை, வடசென்னை, அசுரன், விடுதலை உள்ளிட்ட பல வெற்றி படங்களை இயக்கி உள்ளார். சமீபத்தில் விஜய்சேதுபதி, சூரி, மஞ்சுவாரியர் நடிப்பில் வெளியான ‘விடுதலை – 2’ படத்தை வெற்றிமாறன் இயக்கியிருந்தார்.

தொடர்ந்து சூர்யா நடிக்கும் ‘வாடிவாசல்’ படத்தை வெற்றிமாறன் இயக்கவுள்ளார். இந்த படத்துக்கு ஜி.வி.பிரகாஷ் இசையமைக்கிறார். ஜல்லிக்கட்டை மையமாக வைத்து உருவாகும் இந்த படத்திற்காக மாடுபிடி வீரர்களுடன் சூர்யா பயிற்சி மேற்கொள்ளும் வீடியோவை கடந்த ஆண்டு படக்குழு வெளியிட்டது. இதனால் உடனே படப்பிடிப்பு தொடங்கும் என எதிர்பார்க்கப்பட்ட நிலையில், படப்பிடிப்பு பணிகள் தொடங்கவில்லை.

இந்த நிலையில், ‘வாடிவாசல்’ படத்தை தயாரிக்க உள்ள தயாரிப்பாளர் எஸ். தாணு தனது எக்ஸ் தள பக்கத்தில், “அகிலம் ஆராதிக்க ‘வாடிவாசல்’ திறக்கிறது” என்று பதிவிட்டுள்ளார். இதனால் வாடிவாசல் படத்திற்கான படப்பிடிப்பு விரைவில் தொடங்கப்படலாம் என எதிர்பார்க்கப்படுகிறது. ‘வாடிவாசல்’ படம் குறித்த அப்டேட்டால் ரசிகர்கள் உற்சாகம் அடைந்துள்ளனர். ‘வாடிவாசல்’ படத்தை தொடர்ந்து இயக்குநர் வெற்றிமாறன், தனுஷ் நடிக்கும் புதிய படத்தை இயக்குகிறார். தற்போது நடிகர் சூர்யா ஆர்.ஜே.பாலாஜி இயக்கி வரும் படத்தில் நடித்து வருகிறார் என்பது குறிப்பிடத்தக்கது.