லேப்ரடார் நாயுடன், கயல் சந்திரன் நடிக்கும் 'சிங்கா' திரைப்படம்

ருத்ரம் சினிமாஸ் சார்பில் அறிமுக இயக்குனர் ராஜ துரை சிங்கம் எழுதி, இயக்கியுள்ள புதிய படம், ‘சிங்கா’. ‘கயல்’ சந்திரன் கதாநாயகனாக நடித்துள்ளார். மலையாள நடிகைகள் சிஜா ரோஸ் மற்றும் மீனாட்சி ரவிந்திரன் கதாநாயகிகளாக நடித்துள்ளனர். மேலும் இதில் ஆதித்யா கதிர், சூப்பர் குட் சுப்ரமணி, டி.எஸ்.ஆர். மற்றும் மலையாள நகைச்சுவை நடிகர் அரிஸ்டோ சுரேஷ் ஆகியோரும் நடிக்கிறார்கள்.

‘சிங்கா’ படம் குறித்து கயல் சந்திரன் கூறியதாவது:- “சிங்கா படம் எனக்கு பல்வேறு அனுபவங்களையும், உணர்ச்சிகளையும் தந்த அழகான பயணம். இதுவெறும் நாயைப் பற்றிய கதை அல்ல. அன்பு, பிணைப்பு, தேடல், நம்பிக்கை போன்ற மனிதனின் மனநிலைகளையும், செல்லப்பிராணியின் தூய உணர்வுகளையும் வெளிப்படுத்துகிறது. குறிப்பாக நாயுடன் இணைந்து நடித்தது மிகவும் சவாலானது.

நாய்களும், குழந்தைகளும் நீண்ட நேரம் கட்டுப்பாட்டில் இருக்கமாட்டார்கள். அதனால் பொறுமை எவ்வளவு அவசியம்? என்பதை ஆழமாக உணர்ந்தேன். அந்த கடினமான தருணங்களை இயக்குனர் பொறுமையுடன் கையாண்ட விதம் எனக்கு மிகவும் பிடித்தது. ‘சிங்கா’ என்னை கவர்ந்தது போல நிச்சயம் ரசிகர்களையும் கவர்வான் என்பதில் எந்த சந்தேகமும் இல்லை.

தனிப்பட்ட முறையில், ‘சிங்கா படத்தினை திரையில் வரும் தருணத்தை என் சிறிய மகன் எப்படி எதிர்கொள்வான்? என்பதைக் காண்பதற்காக காத்திருக்கிறேன். அவன் விலங்குகள், பறவைகள் மீது அன்பு கொண்டாலும், நாய்களைப் பார்த்தால் கொஞ்சம் பயப்படுவான். இந்த படம் அவன் பார்வையை மாற்றும் என்று நம்புகிறேன். படப்பிடிப்பின் போது நாயின் அன்பை உணர்ந்தபோது என்னுள் தோன்றியது, மனிதர்கள் நாய்களைப் போல பரிசுத்தமான அன்பை கொடுத்து வாழ்ந்தால் இந்த உலகம் இன்னும் அழகாக இருக்கும் என்பதுதான். இந்த படம் அனைவரையும் ஈர்க்கும்”, என்று கயல் சந்திரன் கூறினார்.