சூர்யாவின் அகரம் அறக்கட்டளையின் நற்பணிகளை பாராட்டிய கமல்

சூர்யாவின் அகரம் பவுண்டேஷனின், விதைத் திட்டம் 15-வது ஆண்டில் அடியெடுத்து வைக்கிறது. இதை முன்னிட்டு சென்னையில் இன்று பிரமாண்ட விழா நடைபெற்றது. இந்நிகழ்ச்சியில், சிவக்குமார், சூர்யா, கார்த்தி, கமல்ஹாசன், தயாரிப்பாளர் கலைப்புலி எஸ். தாணு, வெற்றிமாறன், இஸ்ரோ விஞ்ஞானி வீரமுத்துவேல், கம்யூனிஸ்ட் எம்.பி வெங்கடேசன் உள்ளிட்டோர் கலந்துகொண்டனர்.

இந்நிகழ்ச்சியில், கலந்து கொண்ட கமல்ஹாசன் ” கல்வியும், அன்பும் ஒருங்கே கிடைப்பதில்லை. அம்மாவிடம் கிடைக்கும். அகரத்தில் கிடைக்கும். அது பெரிய விஷயம். சினிமா வானில் நட்சத்திரமாக இருப்பதற்கு கொடுக்கப்படும் கிரீடம் வேறு. ஆனால், சமூக வானில் இது போன்ற நற்பணிகள் செய்பவர்களுக்கு முள்கிரீடம் தான் கிடைக்கும். பரவாயில்லை அந்த கிரீடம் போதும் எனக்கு என சொல்வதற்கு மனோ பலம் தேவை. தைரியம் தேவை. ஏனென்றால் உடன் யாரும் நிற்கமாட்டார்கள். சர்வாதிகார, சனாதன சங்கிலிகளை எல்லாம் நொறுக்கித் தள்ளும் ஒரே ஆயுதம் கல்விதான்; இதைத் தவிர வேறு எதையும் கையில் எடுக்காதீர்கள்” என்றார்.

இந்நிலையில் சூர்யாவின் அகரம் அறக்கட்டளையின் நற்பணிகளை பாராட்டி கமல் அறிக்கை வெளியிட்டுள்ளார். அதில் ” அகரம் அறக்கட்டளையின் 15 ஆண்டு விழாவில் பங்கேற்றது என்னை மிகவும் நெகிழ்ச்சியடையச் செய்தது. அகரம் அறக்கட்டளை, கல்வி மற்றும் சமூக மாற்றத்திற்காக கடந்த 20 ஆண்டுகளாக உழைத்து வருகிறது. அனைவருக்கும் தரமான கல்வியை கிடைக்கச் செய்வதில் அகரம் அறக்கட்டளை முக்கியப் பங்கு வகிக்கிறது. அற உணர்வுள்ள தன்னார்வலர்கள், அரசுப் பள்ளி ஆசிரியர்கள், நன்கொடையாளர்கள், கல்லூரி நிறுவனங்கள் என அனைவரும் இணைந்த கூட்டு இயக்கமாக அகரம் செயல்பட்டு வருகிறது.

பல ஆயிரம் மாணவர்களின் வாழ்வில் கல்வி மிகப் பெரிய மாற்றத்தை அகரம் உருவாக்கி இருக்கிறது. அகரம் மூலம் அமைதியான புரட்சியை ஏற்படுத்தி, ஒரு கனவை வளர்த்து வருகிறீர்கள். உங்கள் அறக்கட்டளையின் பணி எண்ணிக்கையில் அளவிடப்படாது. அதிகாரம் பெற்ற ஒவ்வொரு மாணவரும் சமூகத்தை வழிநடத்தவும், மற்றவர்களை உயர்த்தும் திறனைக் கொண்டுள்ளார்கள். உங்கள் லட்சியத்தில் உங்கள் உறவினராக, மக்களின் பிரதிநிதியாக நான் உங்களுடன் இருப்பேன்.” என்று குறிப்பிட்டுள்ளார். அகரம் அறக்கட்டளையின் எதிர்காலப் பணிகளுக்கும் தனது வாழ்த்துக்களைத் தெரிவித்தார்.