தேனிசைத் தென்றல் தேவாவுக்கு இலங்கையில் இருந்து உலகளவில் வெளியிடப்பட்ட இரங்கல் பாடல்

தேவா

தமிழ்த் திரையுலகின் பிரபல இசையமைப்பாளர் தேனிசைத் தென்றல் தேவாவின் மறைவைத் தொடர்ந்து, கவிஞரும் திரைப்படப் பாடலாசிரியருமான பொத்துவில் அஸ்மின், அவருக்கு அஞ்சலி செலுத்தும் வகையில் இரங்கல் பாடலொன்றை எழுதி வெளியிட்டுள்ளார்.

“நல்லவருக்கு நல்லவர… இனி நாம் பார்க்க முடியாது…” என்ற உருக்கமான வரிகளுடன் உருவாகியுள்ள இப்பாடல், தேவாவின் மறைவால் ஏற்பட்டுள்ள துயரத்தையும், தமிழ் இசையுலகிற்கு அவர் ஆற்றிய பங்களிப்பின் மீதான அன்பையும் வெளிப்படுத்தும் வகையில் அமைந்துள்ளது.

தேனிசைத் தென்றல் தேவாவுக்கு அஞ்சலி செலுத்தும் வகையில் உலகளவில் வெளியிடப்பட்ட முதல் இரங்கல் பாடல் இதுவெனப் படைப்பாளர் தரப்பில் தெரிவிக்கப்படுகிறது.

மறைந்த தலைவர்களுக்காகவும் இரங்கல் படைப்புகள்


மறைந்த முக்கிய ஆளுமைகளின் நினைவாகப் பாடல்களையும் கவிதைகளையும் படைத்துவரும் பொத்துவில் அஸ்மின், இதற்கு முன்னரும் பல இரங்கல் படைப்புகளை உருவாக்கியுள்ளார்.

மறைந்த தமிழக முன்னாள் முதலமைச்சர் ஜெயலலிதாவின் மறைவையொட்டி “வானே இடிந்ததம்மா” என்ற இரங்கல் பாடலையும், மறைந்த தமிழக முன்னாள் முதலமைச்சர் கலைஞர் மு. கருணாநிதிக்காக “திருக்குவளை சூரியன்” என்ற இரங்கல் கவிதையையும் எழுதியுள்ளார்.

கலைஞர் கருணாநிதிக்காக அவர் எழுதிய “திருக்குவளை சூரியன்” கவிதை, கவிப்பேரரசு வைரமுத்து தொகுத்த “கலைஞர் நூறு கவிதைகள்” என்ற நூலிலும் இடம்பெற்றுள்ளது குறிப்பிடத்தக்கது.

அதேபோன்று, மறைந்த பின்னணிப் பாடகர் எஸ்.பி. பாலசுப்பிரமணியத்தின் நினைவாகக் கலைஞர்கள் சார்பில் சமர்ப்பிக்கப்பட்ட “எழுந்து வா இசையே” என்ற அஞ்சல் படைப்பிலும் பொத்துவில் அஸ்மின் பங்களித்துள்ளார்.

விஜய் ஆண்டனி திரைப்படத்தின் மூலம் அறிமுகம்


1997ஆம் ஆண்டு முதல் இலக்கியப் பயணத்தில் ஈடுபட்டுவரும் பொத்துவில் அஸ்மின், விஜய் ஆண்டனி நடிப்பில் வெளியான ‘நான்’ திரைப்படத்தில் இடம்பெற்ற “தப்பெல்லாம் தப்பே இல்லை” என்ற பாடலின் மூலம் தமிழ்த் திரையுலகில் பாடலாசிரியராக அறிமுகமானார்.


தொடர்ந்து பல திரைப்படங்களுக்குப் பாடல்களை எழுதியுள்ள இவர், தனது தனித்துவமான பாடல் வரிகளால் தமிழ் இசையுலகில் கவனம் பெற்றுள்ளார்.

இலங்கையில் பெரும் வரவேற்பைப் பெற்ற “ஐயோ சாமி, நீ எனக்கு வேணாம்” என்ற பாடலும் இவரது பாடலாசிரியர் பயணத்தில் குறிப்பிடத்தக்க இடத்தைப் பெற்றுள்ளது. இப்பாடல் சர்வதேச அளவிலும் கவனம் ஈர்த்துள்ளது.

கவிஞராகவும் திரைப்படப் பாடலாசிரியராகவும் மட்டுமன்றி, ஊடகத்துறையிலும் பொத்துவில் அஸ்மின் தனது பங்களிப்பை வழங்கியுள்ளார். தொலைக்காட்சி நிகழ்ச்சித் தயாரிப்பாளராகவும் தொகுப்பாளராகவும் பணியாற்றியுள்ள இவர், இலக்கியம் மற்றும் கலைத்துறைகளில் பல்வேறு விருதுகளையும் பெற்றுள்ளார்.

இசையால் வாழும் நினைவுகளுக்கு அஞ்சலி


தேனிசைத் தென்றல் தேவா தனது இசையமைப்பின் மூலம் தமிழ் ரசிகர்களுக்கு வழங்கிய பாடல்களும், தமிழ் இசையுலகில் அவர் பதித்த தடங்களும் என்றும் நினைவுகூரப்படும் நிலையில், அவருக்காகப் பொத்துவில் அஸ்மின் உருவாக்கியுள்ள இந்த இரங்கல் பாடல், மறைந்த இசைக்கலைஞரின் நினைவுகளுக்கு உணர்வுபூர்வமான அஞ்சலியாக அமைந்துள்ளது.