“மதராஸி” கண்டிப்பாக கம்பேக் படமாக இருக்கும்- ஏ.ஆர்.முருகதாஸ் | “Madraasi” will definitely be a comeback film

சென்னை,

பிரபல இயக்குனர் ஏ.ஆர். முருகதாஸ் இயக்கத்தில் சிவகார்த்திகேயன் தனது 23-வது படமான மதராஸி திரைப்படத்தில் நடித்து முடித்துள்ளார். இந்த படத்தில் சிவகார்த்திகேயனுடன் இணைந்து ருக்மினி வசந்த், விக்ராந்த், வித்யூத் ஜம்வால், பிஜு மேனன், டான்சிங் ரோஸ் சபீர் ஆகியோர் முக்கிய கதாபாத்திரங்களில் நடித்துள்ளனர்.

இந்த படத்தை ஸ்ரீ லட்சுமி மூவிஸ் நிறுவனம் தயாரிக்க அனிருத் இதற்கு இசை அமைத்திருக்கிறார். இந்த படத்திற்கு தமிழில் ‘மதராஸி’ என்றும் இந்தியில் ‘தில் மதராஸி’ என்ற தலைப்பு வைக்கப்பட்டுள்ளது. ஆக்சன் திரில்லர் ஜனரில் உருவாகியுள்ள இப்படம் பான் இந்தியா அளவில் வருகிற செப்டம்பர் 5ம் தேதி திரையரங்குகளில் வெளியாக உள்ளது.

இந்த நிலையில், இயக்குனர் ஏ.ஆர்.முருகதாஸ் பேட்டி ஒன்றில், “இந்தியில் சல்மான்கானை வைத்து நான் இயக்கிய சிக்கந்தர் எதிர்பார்த்த வெற்றி அடையவில்லை என்றாலும், தற்போது இயக்கியுள்ள மதராஸி படம் கண்டிப்பாக எனக்கு கம்பேக் படமாக இருக்கும் என்றார். மேலும், சூர்யாவின் கஜினி படத்தின் திரைக்கதையை போலவும், விஜய்யை வைத்து இயக்கிய துப்பாக்கி படத்தின் ஆக்ஷன் பாணியையும் கலந்து இயக்கி இருக்கிறேன். அதனால் இந்த மதராஸி படம் ரசிகர்களுக்கு ஒரு புதிய அனுபவத்தை கொடுக்கக் கூடியதாக இருக்கும்” என்று பேசியுள்ளார்.