‘மிஸஸ் அண்ட் மிஸ்டர்’ படத்திலிருந்து இளையராஜா பெயர் நீக்கம்

சென்னை,

நடிகை வனிதா விஜயகுமார் தனது மகள் ஜோவிகா தயாரிப்பில் ‘மிஸ்ஸஸ் & மிஸ்டர்’ என்ற படத்தில் நடித்துள்ளார். இதில் ராபர்ட் மாஸ்டர் முக்கிய கதாபாத்திரத்தில் நடித்துள்ளார். ரொமான்ஸ் கதைக்களத்தில் உருவாகியுள்ள இப்படம் சமீபத்தில் வெளியானது.

இந்த திரைப்படத்தில் இசையமைப்பாளர் இளையராஜா இசையமைத்த ‘மைக்கேல் மதன காமராஜன்’ திரைப்படத்தில் இடம்பெற்ற ‘ராத்திரி சிவ ராத்திரி…’ பாடல் இடம்பெற்றுள்ளது. அதற்காக ‘மிஸஸ் அண்ட் மிஸ்டர்’ படத்திற்கு எதிராக இசையமைப்பாளர் இளையராஜா வழக்குத் தொடர்ந்தார்.

அதாவது, தான் இசையமைத்த பாடலை அனுமதியில்லாமல் ‘மிஸஸ் அண்ட் மிஸ்டர்’ திரைப்படத்தில் பயன்படுத்தி இருப்பதாகவும், பாடலை மாற்றி அமைத்துள்ளதாகவும் இளைராஜா தரப்பில் வழக்கு தாக்கல் செய்யப்பட்டுள்ளது. இது காப்புரிமை மீறிய செயல் என்றும் உடனடியாக அந்தப் பாடலை திரைப்படத்தில் இருந்து நீக்க உத்தரவிட வேண்டும் எனவும் இளையராஜா மனுவில் தெரிவித்துள்ளார்.

இந்த வழக்கு, நேற்று விசாரணைக்கு வந்தது. அப்போது இளையராஜாவின் தரப்பினர் பாடலை பயன்படுத்தியது மட்டுமல்லாமல் அவரின் பெரியரையும் பயன்படுத்தப்பட்டுள்ளதாக தெரிவித்தனர்.

இதையடுத்து நடிகை வனிதா தரப்பில் வாதாடிய வழக்கறிஞர், ”எக்கோ நிறுவனத்திடம் இருந்து, இளையராஜாவின் 4,850 பாடல்களை, ‘சோனி மியூசிக்’ வாங்கி உள்ளது. அவர்களிடம் இருந்து, பாடல்களை பயன்படுத்த அனுமதி பெற்றுள்ளோம் என்று தெரிவித்தார். மேலும் படத்தில் இளையராஜாவின் பெயர் பயன்படுத்தப்பட்டதை நீக்கிவிட்டதாக குறிப்பிட்டார். இரு தரப்பு வாதங்களை கேட்ட நீதிபதி, இந்த வழக்கில், சோனி மியூசிக் நிறுவனத்தையும் சேர்க்க உத்தரவிட்டு, ஆகஸ்ட் 18ம் தேதிக்கு விசாரணையை தள்ளிவைத்தார்.