நாக் அஸ்வின் இயக்கத்தில் நடிக்கும் பிரபல பாலிவுட் நடிகை!

சென்னை,

நாக் அஸ்வின் இயக்கத்தில் பிரபாஸ் ஹீரோவாக நடித்த திரைப்படம் ‘கல்கி 2898 ஏடி’. 600 கோடி ரூபாய் பட்ஜெட்டில் உருவான இத்திரைப்படத்தில் அமிதாப் பச்சன், கமல்ஹாசன், தீபிகா படுகோன், திஷா பதானி, அன்னா பென் உள்பட பல பிரபலங்கள் நடித்தனர். கடந்த ஆண்டு வெளியான இப்படம் உலகம் முழுவதும் ரூ,1,100 கோடிக்கு மேல் வசூல் ஈட்டியது. இதனையடுத்து, 2ம் பாகத்தை எதிர்பார்த்து ரசிகர்கள் காத்திருக்கின்றனர். தற்போது அதற்கான பணிகள் நடைபெற்று வருகிறது.

இதற்கிடையில் இயக்குனர் நாக் அஸ்வின் புதிய படம் ஒன்றை இயக்க உள்ளார். வைஜெயந்தி பிலிம்ஸ் தயாரிக்க உள்ள இப்படத்திற்கான கதை தயாராகி உள்ளது. ஒரு பெண்ணை மையமாக கொண்டு இந்த புதிய படம் உருவாக உள்ளது. இப்படத்தில் நடிப்பதற்காக பல்வேறு நாயகிகளிடம் பேச்சுவார்த்தை நடத்தி வந்தார் நாக் அஸ்வின். தற்போது ஆலியா பட் இந்த படத்தில் நடிப்பது உறுதியாகி உள்ளதாக தகவல் வெளியாகி உள்ளது. இந்த படத்தின் படப்பிடிப்பு பணிகள் அக்டோபர் மாதம் துவங்கும் என்று எதிர்பார்க்கப்படுகிறது.

நடிகை ஆலியா பட் தற்போது ரன்பீர் கபூர் மற்றும் விக்கி கவுசலுடன் இணைந்து ‘லவ் அண்ட் வார்’ என்ற படத்தில் நடித்து வருகிறார் என்பது குறிப்பிடத்தக்கது.�

�